Homeዜናና ወቅታዊዜናበአክሱም የት/ቤት ኃላፊዎች በሒጃብ ጉዳይ የተሰጠውን ትዕዛዝ በመጣስ ተማሪዎች ላይ ክልከላ ጣሉ

በአክሱም የት/ቤት ኃላፊዎች በሒጃብ ጉዳይ የተሰጠውን ትዕዛዝ በመጣስ ተማሪዎች ላይ ክልከላ ጣሉ

በአክሱም ከተማ የሚገኙ ትምሕርት ቤቶች፤ የትግራይ ክልል ትምሕርት ቢሮ በሒጃብ ጉዳይ አዲስ ክልከላ እንደማይቀበል በመግለጽ በነባሩ አሠራር እንዲቀጥል ትዕዛዝ ቢያሳልፍም ውሳኔውን በመጣስ ተማሪዎች ወደ ግቢ እንዳይገቡ መከልከላቸው ታውቋል፡፡ “ሚንበር ቲቪ” ይህንን በከተማው በሒጃብ ክልከላ ምክንያት ከትምሕርት ቤት ከተመለሱ ተማሪዎች እና ወላጆች ማረጋገጥ ችሏል፡፡


በከተማው የሒጃብ ክልከላ ከጣሉ ትምሕርት ቤቶች መካከል በአንደኛው የምትማር ሥሟ ለደኅንነት ሲባል እንዳይጠቀስ የጠየቀች ተማሪ ለ“ሚንበር ቲቪ” እንደተናገረችው፤ የክልሉ ትምሕርት ቢሮ ለትምሕርት ቤቶቹ ደብዳቤ መጻፉን ተከትሎ ዛሬ ረቡዕ ታኅሣሥ 23/2017 ወደ ትምሕርት ቤት ቢያመሩም ወደ ውስጥ መግባት እንደማይችሉ ስለተነገራቸው እንደተመለሱ አስረድታለች፡፡ በዛሬው እለት በትምሕርት ቤቶች ዙሪያ ከፍተኛ የፀጥታ ኃይል ሥምሪት እንደነበርም ተማሪዋ እና ወላጆች ገልጸዋል፡፡ በተጨማሪም ክልከላውን ከጣሉት መካከል በሆነው “ክንደያ ትምሕርት ቤት” ሒጃብ ለብሰው ወደ ግቢ ሊገቡ የሞከሩ ተማሪዎች ላይ ድብደባ እንደፈጸመ ተሰምቷል፡፡


የትግራይ ክልል ትምሕርት ቢሮ ታኅሣሥ 22/2017 “የትምሕርት ቤት አካሄድ ሥርዐትን በተመለከተ” በሚል ርእሰ ለአክሱም ከተማ ትምሕርት ቢሮ በላከው ደብዳቤ፤ በአክሱም ከተማ በእስልምና እምነት ተከታይ ሴት ተማሪዎች ላይ የተጣለውን የአለባበስ እገዳ በተመለከተ ከአክሱም ከተማ እስልምና ጉዳዮች ጽሕፈት ቤት ቅሬታ እንደቀረበለት በመግለጽ፤ በከተማው “የተለመደው የትምሕርት ቤት አካሄድ ሥርዐት እንዲቀጥል” ትዕዛዝ አስተላልፏል፡፡


ቢሮው የተለየ አዲስ መመሪያ እስካልወጣ ድረስ “አዲስ እገዳም ሆነ አዲስ ጥያቄ” ተቀባይነት የሌለው መሆኑን በገለጸበት ደብዳቤ፤ የተማሪዎች አለባበስን በተመለከተ ግን ተግባራዊ ሊደረግ ይገባል በሚል የጠቀሰው መመሪያ የለም፡፡


ሆኖም በዛሬው እለት ወደ ትምሕርት ቤቶች ያመሩ ተማሪዎችን አናስገባም ያሉ ትምሕርት ቤቶች ኃላፊዎች፤ ትምሕርት ቢሮ በግልጽ ተማሪዎቹ እንዲገቡ የሚገልጽ ደብዳቤ ባለመጻፉ ውሳኔውን እንደማይቀይሩ መናገራቸውን ሥሟ እንዳይጠቀስ የጠየቀችዋ ተማሪ ተናግራለች፡፡ ደብዳቤው ክልከላውን እንዲያጠናክሩ ማድረጉንም አክላለች፡፡


በአክሱም ከተማ ሴት ተማሪዎች በትምሕርት ቤቶች በተጣለው ሒጃብ ክልከላ ምክንያት ከትምሕርት ገበታ ውጪ የሆኑት ከታኅሣሥ 8/2017 አንስቶ ነው፡፡


በከተማው በተማሪዎች ላይ የሒጃብ ክልከላውን ጥለውታል የተባሉት ትምህርት ቤቶች በቀጥር ቢያንስ አምስት ናቸው፡፡ ትምሕርት ቤቶቹ “አክሱም ሁለተኛ ደረጃ ትምህርት ቤት”፣ “አሉሚናይ”፣ “ወርኣይ”፣ “ክንደያ” እና “ኣብርሃ ወ ኣጽብሃ” መሆናቸውም ታውቋል፡፡
በትምሕርት ቤቶቹ የ12ኛ ክፍል ተማሪዎች የሀገር አቀፍ ፈተና ቅጽ የሚሞሉበት ጊዜ ታኅሣሥ 14/2017 የጀመረ ቢሆንም፤ ሙስሊም ሴት ተማሪዎች ከትምሕርት ገበታ ውጪ ለመሆን በመገደዳቸው መሙላት እንዳልቻሉ ተናግረዋል፡፡ በሒጃብ ክልከላው ምክንያት በተለይ “ወርኢይ” በተሰኘው ትምህርት ቤት ውስጥ የሚገኙ ሴት ተማሪዎች፤ የሴሚስተር አካፋይ (Mid semester) ፈተና ላይ መቀመጥ ሳይችሉ መቅረታቸው ታውቋል፡፡


ከጉዳዩ ጋር በተገናኘ የትግራይ ክልል እስልምና ጉዳዮች ከፍተኛ ምክር ቤት ትናንት ማክሰኞ ታኅሣሥ 22/2017 ሊሰጥ የነበረውን መግለጫ በመሰረዝ ለሌላ ጊዜ ማዛወሩ ታውቋል። ምክር ቤቱ መግለጫውን ለሌላ ጊዜ ያዛወረው የክልሉ ትምሕርት ቢሮ ለእክሱም ትምሕርት ቤቶች የጻፈውን ትዕዛዝ ተከትሎ ነበር። (ሚንበር ቲቪ)

RELATED ARTICLES

LEAVE A REPLY

Please enter your comment!
Please enter your name here

- Advertisment -
ታላቅ ግብዣ

Most Popular