በትግራይ ክልል አክሱም ከተማ ሴት ተማሪዎች በትምህርት ቤቶች በተጣለው ሒጃብ ክልከላ ምክንያት ከትምህርት ገበታ ውጪ ለመሆን መገደዳቸውን ተናገሩ፡፡ በከተማው በአንደኛ እና ሁለተኛ ደረጃ ትምህርት የሚገኙ ሙስሊም ሴት ተማሪዎች ከታኅሣሥ 8/2017 አንስቶ ሒጃብ አድርገው እንዳይገቡ ክልከላ እንደተጣለባቸው ገልጸዋል፡፡
በአክሱም ከተማ በተማሪዎች ላይ የሒጃብ ክልከላውን ጥለውታል የተባሉት ትምህርት ቤቶች በቀጥር ቢያንስ አምስት መሆናቸውን “ሚንበር ቲቪ” ከተማሪዎች፣ ወላጆች እና ከአክሱም እስልምና ጉዳዮች ከፍተኛ ምክር ቤት ኃላፊዎች ሰምቷል፡፡ ትምህርት ቤቶቹ “አክሱም ሁለተኛ ደረጃ ትምህርት ቤት”፣ “አሉሚናይ”፣ “ወርኣይ”፣ “ክንደያ” እና “ኣብርሃ ወ ኣጽብሃ” መሆናቸውን ለ“ሚንበር ቲቪ” የተናገረች ሥሟ እንዳይጠቀስ የጠየቀች ተማሪ አስረድታለች፡፡
ሁለት ሳምንት ገደማ ባስቆጠረው ክልከላ ምክንያት በተለይ “ወርኢይ” በተሰኘው ትምህርት ቤት ውስጥ የሚገኙ ሴት ተማሪዎች፤ የሴሚስተር አካፋይ (Mid semester) ፈተና ላይ መቀመጥ ሳይችሉ መቅረታቸው ታውቋል፡፡

ተማሪዎቹ ከትምህርት ቤቶቹ ርእሰ መምሕራን ጀምሮ፣ ለአክሱም እስልምና ጉዳዮች እና ትምህርት ቢሮ በጉዳዩ ላይ ቅሬታ ቢያቀርቡም መፍትሔ ማግኘት እንዳልተቻለ ገልጸዋል፡፡ የከተማው ትምህርት ቢሮ በበኩሉ፤ “ትምህርት ቤቶቹ ባስቀመጡት ሕገ ደንብ ስለሚመሩ ጣልቃ አንገባም፤ ሒጃባችን አውልቃችሁ ተማሩ” የሚል ምላሽ ሰጥቷል ተብሏል፡፡
የተማሪዎቹ ቅሬታ እንዲደመጥ አቤቱታ አቅርበንባቸዋል ካሉባቸው አካላት መካከል የአክሱም እስልምና ጉዳዮች ከፍተኛ ምክር ቤት ሊቀመንበር ኡስታዝ ዓብደላ ሙስጠፋ፤ በትግራይ “ከጦርነቱ በኋላ” ሴት ተማሪዎች ሒጃባቸውን አድርገው እንዲማሩ ይፈቀድ እንደነበር በማስታወስ፤ ሒጃባቸውን አውልቀው እንዲገቡ የሚል መመሪያ የመጣው ከርእሰ መምሕራን መሆኑን ገልጸዋል፡፡ ይህንኑ ተከትሎ ከተማሪዎች ቅሬታ በመቅረቡ ለከተማው ትምህርት ቢሮ፣ የከንቲባ ጽሕፈት ቤት እና የፀጥታ ቢሮ ደብዳቤ በመጻፍ ከኃላፊዎች ጋር ለማነጋገር ሞክረው ቀድሞ በውይይት ወቅት አዎንታዊ ምላሽ የተሰጠ ቢሆንም፣ ዘግየት ብሎ የሐሳብ ለውጥ በመደረጉ መፍትሔ አለማግኘቱን ተናግረዋል፡፡
ሊቀመንበሩ ውሳኔው የተላለፈው “በሃይማኖታዊ ብያኔ” ሳይሆን ከወላጅ እና ተማሪዎች ኮሚቴ ጋር በተደረገ ስብሰባ “በድምጽ ብልጫ” መሆኑንም አስረድተዋል፡፡ በዚሁ ጉዳይ “ሚንበር ቲቪ” የትግራይ ክልል እስልምና ጉዳዮች ከፍተኛ ምክር ቤት ከፍተኛ ምክር ቤት ከፍተኛ የሥራ ኃላፊ የሆኑትን ሐጂ ሙሐመድ ካሕሳይን ለማግኘት ያደረገው ጥረት ሳይሳካ ቀርቷል፡፡
በአክሱም ከተማ በአሁኑ ሰዓት ተማሪዎች ሒጃብ ለብሰው ወደ ትምህርት ቤቶች ካመሩ የጸጥታ አካላት በቁጥጥር ስር እንደሚያውላቸው ተሰምቷል፡፡ ባለፉት ሁለት ቀናት ብቻ 17 ተማሪዎች በቁጥጥር ስር ውለው በዋስትና ተለቀዋል ተብሏል፡፡ በከተማው በተለይ የ12ኛ ክፍል ብሔራዊ ፈተና ቅጽ እንዲሞሉ የተቀመጠው የጊዜ ሠሌዳ በዚህ ሳምንት የጀመረ ቢሆንም ሙስሊም ሴት ተማሪዎች ግን በትምህርት ገበታቸው ላይ መገኘት እንዳይችሉ የሒጃብ ክልከላ ስለተጣለ ቅጹን መሙላት እንዳልቻሉም ማወቅ ተችሏል፡፡
በአክሱም ከተማ በሙስሊም ሴት ተማሪዎች የቀረበውን ቅሬታ አስመልክቶ ምላሽ እንዲሰጡ “ሚንበር ቲቪ” የከተማውን ትምሕርት ቢሮ ኃላፊ ወይዘሮ ፀጋ ገብረማርያምን ለማግኘት ያደረገው ሙከራ ምላሽ ባለመስጠታቸው ማካተት ሳይቻል ቀርቷል፡፡
በአክሱም ከተማ ከዚህ ቀደም ሙስሊሞች መስጂድ እንዳይገነቡ ክልከላ ስለተከለከሉ በተደጋጋሚ ቅሬታ እንደሚያቀርቡ የሚታወቅ ነው፡፡












