የኢትዮጵያ እስልምና ጉዳዮች ከፍተኛ ምክር ቤት የፕሬዝዳንት ጽሕፈት ቤት ኃላፊ ኡስታዝ አቡበከር አሕመድ፤ በአዲስ አበባ ከተማ ውስጥ የሚገኘው የሸይኻ ፋጢማ ቢንት ሙባረክ ዓይነ ሥውራን አዳሪ ትምሕርት ቤት ለሙስሊም “ተማሪዎቹ የጀመዓ ሰላት የሚሰግዱበት ቦታ ማዘጋጀቱን ማረጋገጣቸውን” ገልጸዋል፡፡
የፕሬዝዳንት ጽሕፈት ቤት ኃላፊ ይህን የገለጹት ዛሬ ሐሙስ ኅዳር 26/2017 ነው፡፡ ከአዲስ አበባ ትምሕርት ቢሮ ኃላፊ አቶ ዘላለም ጋር በጋራ ተደርጓል ባሉት ጉብኝት፤ ከሰሞኑ በትምሕርት ተቋሙ ትምሕርታቸውን እየተከታተሉ ስለሚገኙ ሙስሊም ተማሪዎች “አያያዝ እና እየተሰሙ ስለቆዩ ቅሬታዎችም” ከትምሕርት ቤቱ አስተዳደርና ከተማሪዎቹ ጋር “ሰፊ ውይይት” አካሔደናል ብለዋል፡፡
በዚህም “መሰል ችግሮች ዳግም እንዳይፈጠሩና ለተፈጠሩትም ዘላቂ መፍትሔ በመፈለግ ላይ ተግባብተናል” ያሉት ኡስታዝ አቡበከር፤ በተማሪዎች በቅሬታ ሲቀርብ የነበረውን ሙስሊም ተማሪዎቹ የጀመዓ ሰላት የሚሰግዱበት ቦታ ተመቻችቶላቸው ሰላታቸውን በወቅቱ መስገድ መቻላቸውን ለማረጋገጥ መቻላቸውንም ጠቁመዋል፡፡
የ“ክብርት ሸይኻ ፋጢማ ቢንት ሙባረክ የዐይነ ሥውራን አዳሪ ትምህርት ቤት”፤ ከዚህ ቀደም ተማሪዎች በግቢው ውስጥ ሰላት እንዳይሰገዱ የጣለው ክልከላ ማንሳቱን ተማሪዎች ለሚንበር ቲቪ የገለጹት ባለፈው ሳምንት ረቡዕ ኅዳር 18/2017 ነበር፡፡ የኢትዮጵያ እስልምና ጉዳየች ጠቅላይ ምክር ቤት የፕሬዝዳንት ጽሕፈት ቤት ኃላፊና የአዲስ አበባ ትምሕርት ቢሮ ኃላፊ በትምሕርት ቤቱ ጉብኝት ያደረጉት ይህ መደረጉ ከተሰማ ከአንድ ሳምንት በኋላ ነው፡፡

በወቅቱ የትምሕርት ቤቱ የሰላት ክልከላ መነሳት ዜና የመጣው የኢትዮጵያ እስልምና ጉዳዮች ጠቅላይ ምክር ቤት በተማሪዎች የሰላት ክልከላ ጉዳይ በኃላፊዎቹ በኩል ከአዲስ አበባ ከተማ ከንቲባ አዳነች አቤቤ ጋር ውይይት ማካሔዱ ከተነገረ በኋላ ነው፡፡ የምክር ቤቱ ኃላፊ ተማረዎቹ በተመሳሳይ ክልከላ ተደርጎብናል ስላሉት የኒቃብ ጉዳይ በውይይቱ ላይ ስለመነሳቱ የገለጹት ነገር የለም፡፡
በአዲስ አበባ ከተማ ባለፈው ወር አጋማሽ በተመሣሣይ በአዲስ ከተማ ክፍለ ከተማ ውስጥ በሚገኙ ቢያንስ አምስት ትምሕርት ቤቶች ውስጥ የሚማሩ ሙስሊም ተማሪዎች “ኒቃብ ለብሳችሁ በትምሕርት ገበታ ላይ መገኘት አትችሉም” እንደተባሉ በመግለጽ ቅሬታቸው አቅርበው ከከተማው እስልምና ጉዳዮች ከፍተኛ ምክር ቤት ኃላፊዎች ጋር ውይይት ማድረጋቸው የሚታወስ ነው፡፡
ይህንኑ ተከትሎ ምክር ቤቱ ጥቅምት 21/2017 ከአዲስ አበባ ትምሕርት ቢሮ፣ ከሠላም እና ፀጥታ ዘርፍ እንዲሁም ከፖሊስ ጋር ውይይት ካደረገ በኋላ ከሙስሊም ሴት ተማሪዎች አለባበስ ጋር በተገናኘ “ምክረ ሐሳብ” ለማቅረብ “ከስምምነት ላይ መደረሱን” አስታውቆ ነበር፡፡ ምክር ቤቱ እስካሁን ድረስ ያቀረበው ምክረ ሐሳብ ስለመኖሩ ያወጣው መረጃ የለም፡፡ (ሚንበር ቲቪ)












