በደቡብ ኢትዮጵያ ክልል እስልምና ጉዳዮች ከፍተኛ ምክር ቤት፤ በጌድዮ ዞን በምትገኘው የይርጋ ጨፌ ከተማ አስተዳደር ከቢላል መስጂድ እና መካነ መቃብር ለኮሪደር ልማት የጠየቀውን “ተጨማሪ መሬት” በመቃወም ደብዳቤ መጻፉ ታወቀ፡፡
የክልሉ ምክር ቤት ለርእሰ መስተዳደሩ ጽሕፈት፣ ለክልሉ ሰላም እና ፀጥታ አካል እንዲሁም ለክልሉ የሃይማኖት ፎረም በጻፈው ደብዳቤ ላይ ለኮሪደር ልማት ይፈለጋል ተብሎ ከተቀመጠው ውጪ ተጨማሪ 10 ሜትር በከተማዋ አስተዳደር መጠየቁን አግባብነት የለውም ብሏል፡፡
የደቡብ ኢትዮጵያ ክልል እስልምና ጉዳዮች ከፍተኛ ምክር ቤት ፕሬዝዳንት ፋሪስ ጀማል ለ“ሚንበር ቲቪ” እንደተናገሩት፤ ምክር ቤቱ ዛሬ ሰኞ ኅዳር 9/2017 በኃላፊዎች በኩል ተቃውሞውን ለሚመለከታቸው የመንግሥት አካላት በደብዳቤ ያቀርባል፡፡
የምክር ቤቱ ተቃውሞ የመጣው የከተማዋ ለ50 ዓመታት በዘላቂ ማረፊያነት ሲያገለግል የቆየው የቢላል መስጂድና መካነ መቃብር፤ ለመንገድ ማስፋፊያ ተፈልጓል ከተባለው አምስት ሜትር ገደማ ተጨማሪ የመካነ መቃብሩን “አስር ሜትር” ተፈልጓል መባሉ በይርጋ ጨፌ አስተዳደር ከተገለጸ በኋላ ነው፡፡ የከተማ አስተዳደሩ ተጨማሪ ያለውን መሬት የጠየቀው “ለመዝናኛ ሥፍራ” መሆኑም ተነግሯል፡፡
የከተማዋ እስልምና ጉዳዮች ከፍተኛ ምክር ቤት ለከተማ አስተዳደሩ በጻፈው ምላሽ፤ ለኮሪደር ልማት “ከመንገድ ጀምሮ የተቀመጠውን የርቀት ደረጃ ስታንዳርድ ጠብቆ እንዲከናወን ቦታውን በማጽዳት ለልማት እንደሚያስረክብ” በመግለጽ፤ “ከዚህ ውጭ የሆነውን የከተማው አስተዳደር ውሳኔ ሕዝቡ እንደሚቃወምና በሸሪዓ ሕግ መሠረት በመቃብር ሥፍራው ምንም ዐይነት መዝናኛም ሆነ ሃይማኖቱ የማይፈቅዳቸው ነገሮች” እንደማይሠሩ በጥብቅ ገልጿል፡፡
ምክር ቤቱ ተቃውሞን ቢገልጽም ኅዳር 4/2017 የይርጋ ጨፌ ከንቲባ አቶ ታደለ ጥላሁን “በግብረ ኃይል ለማስፈረስ” ሥፍራው ላይ መገኘታቸውን የጌዴኦ ዞን እስልምና ጉዳዮች ምክር ቤት፤ ለከተማው አስተዳደር ጽሕፈት ቤት እና ለጌዴኦ ዞን ብልጽግና ፓርቲ ጽሕፈት ቤት በጻፈው ደብዳቤ ላይ አስታውቋል፡፡ በእለቱ ሕዝበ ሙስሊሙ በሥፍራው ተገኝቶ የተቃውሞ ድምጹን ማሰማቱን የገለጸው ምክረ ቤቱ፤ “ግጭት ውስጥ ሊያስገባ” ነበር ባለው ድርጊት 14 ሰዎች ታስረው ከአንደኛው በስተቀር ምሽት ላይ መለቀቃቸውን አመልክቷል፡፡
በምክር ቤቱ ደብዳቤ ላይ መመልከት እንደተቻለው፤ ከቢላል መስጂድ እና መካነ መቃብር ቀድሞ ይፈርሳል ከተባለው የፊት አጥር በተጨማሪ ከጎን አስር ሜትር ፈርሷል፡፡ ይህን የማፍረስ ተግባር በመቃወም በሰላም እና ፀጥታ ምክር ቤት በኩል ከከተማው ከንቲባ ጋር ውይይት ቢደረግም “ምንም የሚቀየር ነገር የለም” በሚል እየተገለጸ እንደሚገኝ ምክር ቤቱ በደብዳቤው ላይ አስፍሯል፡፡
የይርጋጨፌ ከተማ ከንቲባ መቀመጫቸውን ከኢትዮጵያ ውጪ ላደረጉ መገናኛ ለመገናኛ ብዙኃን እንደተናገሩት፤ “ለአምስት ጊዜ ያህል ስብሰባ አድርገው መቃብሩን ለማንሳት ስምምነት ተደርሶ በ10 ቀናት ውስጥ አጽም ወደ ዘላቂ ማረፊያ እንዲዘዋወር ተስማምተናል” ሲሉ ገልጸዋል። ነገር ግን የደቡብ ኢትዮጵያ ክልል የእስልምና ጉዳዮች ምክር ቤት ፕሬዝዳንት ፋሪስ ጀማል፤ በደረሱን ሪፖርቶች የተደረሰ ስምምነት አለመኖሩን ማወቅ ችለናል ሲሉ የከንቲባው መረጃ የተሳሳተ መሆኑን ለ“ሚንበር ቲቪ” አስረድተዋል፡፡
የከተማው አስተዳደር የጠየቀውን ሥፍራ “አንስታችሁ አስረክቡኝ” በማለት ያስቀመጠው የጊዜ ሠሌዳ፤ እሑድ ኅዳር 8/2017 ድረስ መሆኑ ታውቋል፡፡ ሆኖም ፕሬዝዳንቱ መቃብር ተቆፍሮ፣ አጽም ወጥቶ፣ ሸሪዓው በሚፈቅደው መልኩ አጽድቶ ለማስረከብ ስምምነት ስለሚያስፈልግ የሚቀድመው ይህ መሆኑን አያይዘው ገልጸዋል፡፡
በይርጋ ጨፌ የሚገኘው ቢላል መካነ መቃብር፤ በስሩ መስጂድ የያዘ መሆኑ የሚታወቅ ነው፡፡ (ሚንበር ቲቪ)












