Homeዜናና ወቅታዊዜናቢቢሲ፤ በዘገባዎቹ “ለእስራኤል ወገንተኝነት አሳይቷል” ባሉ ባልደረቦቹ ወቀሳ ተሰነዘረበት

ቢቢሲ፤ በዘገባዎቹ “ለእስራኤል ወገንተኝነት አሳይቷል” ባሉ ባልደረቦቹ ወቀሳ ተሰነዘረበት

በእንግሊዝ ለንደን ከተማ መቀመጫውን ያደረገው ብሪቲሽ ብሮድካስቲንግ ኮርፖሬሽን (ቢቢሲ)፤ በዘገባዎቹ ለእስራኤል ወገንተኝነት አሳይቷል ባሉ ከ100 በላይ ባልደረቦች ወቀሳ ቀርቦበታል፡፡

የኮርፖሬሽኑ ባልደረቦች ወቀሳ የሠፈረበትን ደብዳቤ ካሰባሰቡት ፊርማ ጋር አያይዘው ለኃላፊዎች መላካቸው ታውቋል፡፡ ባለፈው ሳምንት መጨረሻ ጁመዐ ለቢቢሲ ዋና ዳይሬክተር ቲም ዴቪ እና ዋና ሥራ አስፈጻሚዋ ዲቦራህ ተርኔስ በደረሰው ደብዳቤ፤ የጣቢያው ባልደረቦች በጋዛ ጉዳይ አሳይቶታል ባሉት ውገና “የጋዜጠኝነት መሠረታዊ መርህ” ተጥሷል ሲሉ ከሰዋል፡፡

የ230 የቢቢሲ ባልደረቦች ፊርማ በሠፈረበት ደብዳቤው ላይ በጣቢያው ውስጥ ከጋዜጠኝነት በተጨማሪ በሌሎች ዘርፎች የሚሠሩ ሠራተኞችም መካተታቸውን የሚድል ኢት ዐይ ዘገባ ያመለክታል፡፡ ወቀሳውን ያቀረቡ ባልደረቦች ቢቢሲ ፋይናንስ ከሕዝብ የሚሰበሰብ መሆኑን በመጥቀስ የሞራል ጥያቄ በማንሳት ተከራክረዋል፡፡

ፊርማውን ያሳሰቡ ባልደረቦች ቢቢሲ የጋዛን ጉዳይ በሚመለከት በሚሠራቸው ዘገባዎች ከርእስ አመራረጥ ጀምሮ የዜና ዳራ አሰጣጥን በተመለከቱ ጉዳዮችም አካሔዱ ትክክለኛ አለመሆኑን በመጥቀስ አሠራሩን እንዲፈትሽ ጥሪ አቅርበዋል፡፡ በተጨማሪም የእስራኤል ባለሥልጣናት የሚፈጽሙትን ጥቃት በሥሙ እንዲጠራም ጠይቀዋል፡፡

የእንግሊዙ መገናኛ ብዙኃን በባልደረቦቹ ለሚቀርብት ወቀሳ ተደጋጋሚ ማስተባበያ ሲሰጥ ቆይቷል፡፡ ባለፈው ሳምንት መጨረሻ ባወጣው ማስተባበያም “ስህተት ስንሠራ አልያም በዘገባዎች ላይ ለውጥ በምናደርግበት ጊዜ የምንሠራው በግልጽነት ነው” ሲል ጥቅል ምላሽ ሰጥቷል፡፡

በጋዛ ጉዳይ በሚያቀርባቸው ዘገባዎች ቅሬታ ቀረበበት ቢቢሲ፤ ከባለፈው ዓመት ሚያዝያ ወር አንስቶ የገንዘብ አሰባሰብ ዘዴውን በመቀየር በሀገሪቱ ከእያንዳንዱ አባወራ በዓመት 169.50 ፓዉንድ የሚሰበስብ ነው፡፡ እ.አ.አ በ1922 ብሪቲሽ ብሮድካስቲንግ ካምፓኒ በሚል ሥያሜ የተመሠረተው ጣቢያው፤ በአሁኑ ሰዓት በአጠቃላይ 21 ሺሕ ሠራተኞችን ይዟል፡፡ (ሚንበር ቲቪ)

RELATED ARTICLES

LEAVE A REPLY

Please enter your comment!
Please enter your name here

- Advertisment -
ታላቅ ግብዣ

Most Popular