“ሚንበር መልቲ ሚዲያ ፕሮዳክሽን”፤ ከሙስሊም ተማሪዎች ሊግ ጋር በትብብር ለመሥራት የሚያስችለውን የመግባቢያ ስምምነት የተፈራረመው በዛሬው እለት ነው፡፡ ሰኞ ጥቅምት 25/2017 የተደረገው ስምምነት፤ በሁለቱ ተቋማት መካከል ከዚህ ቀደም በተለይ በወጣቶች ዙርያ “እስከዛሬ የነበረውን የሥራ ትብብር ይበልጥ ለማሳደግ ያለመ” መሆኑ በሥነ ሥርዓቱ ላይ ተገልጿል፡፡
የመግባቢያ ስምምነቱን በሚንበር መልቲ ሚዲያ ፕሮዳክሽን በኩል ዋና ሥራ አስፈጻሚው አቶ አዩብ አደም እና የሙስሊም ተማሪዎች ሊግ ቦርድ ሰብሳቢ አቶ ዓብዱልመጂድ ጀማል ፈርመዋል፡፡
ዋና ሥራ አስፈጻሚው፤ ከ“ሚንበር ቲቪ” ስድስት ምሰሶዎች ውስጥ ወጣቶችን በሁሉም መስክ ማብቃት (Empowerment) አንደኛው መሆኑን በመጥቀስ፤ የሙስሊም ተማሪዎች ሊግ በዚህ መስክ በጥምረት ለመሥራት ወደ “[ጣቢያችን] በመምጣቱና እኛም አጋር በመሆናችን ኩራት ይሰማናል” ሲሉ ተናግረዋል፡፡ በዚህ ትብብር “ወደፊት ማኅበረሰብ ሊያጋጥመው የሚችለውን ተግዳሮት ለመጋፈጥ ወጣቶች መፍትሔ አመንጪ እንዲሆኑ ማድረግ ይቻላል” በማለትም ስምምነቱ በረዥም ጊዜ ሊኖረው የሚችለውን ፋይዳ አስረድተዋል፡፡

የመግባቢያ ስምምነት የተፈራረመው የሙስሊም ተማሪዎች ሊግ፤ በሚንበር መልቲ ሚዲያ ፕሮዳክሽን ስር በሚተዳደረው “ሚንበር ቲቪ” ለተማሪዎች እና ወጣቶች የሚሰናዱ ዝግጅቶችን ሲያቀርብ የቆየ መሆኑ ይታወቃል፡፡ በጣቢያው ሲቀርቡ ከነበሩ ፕሮግራሞች መካከል ከአንድ ዓመት በላይ ወደተመልካቾች የደረሰው “የመጻሕፍት ዳሰሳ” እና “ቅን ትውልድ” ተጠቃሽ ናቸው፡፡ የሙስሊም ተማሪዎች ሊግ ቦርድ ሰብሳቢ አቶ ዓብዱልመጂድ ጀማል ስምምነቱ ይህንኑ “ይበልጥ አጠናክሮ ለመቀጠል ጠቃሚ” እንደሚሆንም ያላቸውን ተስፋ ገልጸዋል፡፡

የሚንበር መልቲ ሚዲያ ዋና ሥራ አስፈጻሚ አቶ አዩብ አደም፤ በስምምነቱ መሠረት ሚንበር ቲቪ የሙስሊም ተማሪዎች ሊግ ለሚሠራቸው ፕሮግራሞች ቴክኒካዊ ድጋፍ መስጠትን ጨምሮ የተለያዩ ሞያዊ እገዛዎችን እንደሚያደርግ በመግለጽ፤ ጥምረቱን ለወጣቶች “ጠቃሚ ነው” ብለውታል፡፡ አያይዘውም የተቋማት በጋራ መሥራት መለመድ ያለበት ጉዳይ መሆኑን የገለጹ ሲሆን፣ እንደ ተቋም ከዚህ ቀደም ከሌሎች ጋር በጋራ የመሥራት ልምድ እየዳበረ የመጣ መሆኑንም ጠቅሰዋል፡፡ ጣቢያው የአመራርነት ሥልጠና እና በምርምር ላይ ከተሰማራው ከ“ቢልኮር” ጋር ሲሠራ መቆየቱንም በምሣሌነት አንስተዋል፡፡ በዛሬው ስምምነት ዋና ሥራ አስፈጻሚው በጋራ ስለ መሥራት አጽንኦት ሰጥተው ተናግረዋል፡፡ “የብቻ ጉዞ የትም አያደርስም” ያሉት አቶ አዩብ አደም፤ ተቋማት ይህንኑ አሠራር ቢተገብሩት መልካም እንደሚሆን በመግለጽ የትብብር ጥሪ አስተላልፈዋል፡፡
ከሚንበር መልቲ ሚዲያ ፕሮዳክሽን ጋር የመግባቢያ ስምምነት የተፈራረመው የሙስሊም ተማሪዎች ሊግ፤ የላቀ ውጤት ላስመዘገቡ ተማሪዎች በሚያዘጋጀው ሽልማት እንዲሁም የተለያዩ ሥልጠናዎችን ለወጣቶች በመስጠት ይታወቃል፡፡












