Homeዜናና ወቅታዊዜናበደራ ወረዳ የመስጂድ ኢማም የነበሩት የሸይኽ ሙሐመድ መኪን ግድያ ምክር ቤቱ አወገዘ

በደራ ወረዳ የመስጂድ ኢማም የነበሩት የሸይኽ ሙሐመድ መኪን ግድያ ምክር ቤቱ አወገዘ

የአዲስ አበባ እስልምና ጉዳዮች ከፍተኛ ምክር ቤት፣ በኦሮሚያ ክልል ሰሜን ሸዋ ዞን ደራ ወረዳ በገንደ ዐረብ መንደር የመስጂድ ኢማም የነበሩት ሸይኽ ሙሐመድ መኪን ግድያ በማውገዝ መግለጫ አውጥቷል፡፡ “በታጣቂዎች” ተፈጽሟል በተባለው ጥቃት የተገደሉ የኢማሙ ቤተሰብ አባላት ብዛት 13 ደርሷል ተብሏል፡፡ 

በምክር ቤቱ መግለጫ መሠረት የመስጂድ ኢማም የነበሩት ሸይኽ ሙሐመድ መኪን የተገደሉት ትናንት ጁመዓ ጥቅምት 22/2017 ነው፡፡ “ሚንበር ቲቪ” ይህንኑ ከቅርብ ቤተሰብ ማረጋገጥ ችሏል፡፡ እንደ ቤተሰብ ምንጭ ከሆነ ሸይኽ ሙሐመድ መኪን ለረዥም ዓመታት ካገለገሉበት መስጂድ ከ20 ቀናት በፊት የፈጅር ሰላት አሰግደው ሲወጡ በታጣቂዎች ታግተው ማስለቀቂያ ገንዘብ ተጠይቆባቸው ነበር፡፡ 

ከእርሳቸው በተጨማሪም ባለቤት እና እናታቸውን ጨምሮ ለታገቱት የተጠየቀው ገንዘብ 2.5 ሚሊዮን ብር እንደነበር ያስታወሱት የቅርብ ቤተሰብ፣ ከተጠየቀው ገንዘብ 1.5 ሚሊዮን ብር ለኢማሙ ተጠይቆ ቢከፍሉም ከግድያው ማትረፍ እንዳልተቻለ ገልጸዋል፡፡ ከታገቱት ውስጥ የሸይኽ ሙሐመድ ባለቤት እና እናት ተለቀዋል ተብሏል፡፡ 

ታጣቂዎቹ ኢማሙ ላይ ግድያውን የፈጸሙት ትናንት ሌሊት መሆኑንም ምንጩ አስረድተዋል፡፡ የሸይኽ ሙሐመድ አስከሬን በገበሬ ማሣ ውስጥ መገኘቱ ሲገለጽ፤ ማንነታቸውን መለየት በቻሉ የአካባቢው ሰዎች የቀብር ሥነ ሥርዐታቸው በዚያኑ ዕለት እንደተፈጸመ ታውቋል፡፡ ከአንድ ቤተሰብ የተገደሉ ሰዎች ቁጥር እስካሁን ድረስ 13 መድረሱም ነው የተገለጸው፡፡ 

ታጣቂዎቹ በአሁኑ ሰዓት ኢማሙ ሲያሰግዱ የቆዩበትን መስጂድ ጥሰው በመግባት ፀያፍ ተግባራትን እየፈጸሙ እንደሚገኙም ተሰምቷል፡፡ ግድያውን በተመለከተ እስካሁን ድረስ በአካባቢው የሚገኘው የመንግሥት የፀጥታ መዋቅር በይፋ ያለው ነገር የለም፡፡

በጉዳዩ ላይ ዛሬ እኩለ ቀን መግለጫ ያወጣው የአዲስ አበባ እስልምና ጉዳዮች ከፍተኛ ምክር ቤት፤ “ዑለሞችና ኢማሞችን በመግደል የሚገኝ የፖለቲካ ትርፍ የለም” በሚል ርእስ ባወጣው መግለጫው፤ ኢማሞች “የማኅበረሰብ መንፈሣዊ መሪዎች፤ የምድራችን አብሪ ከዋክብት፤ የቅን መንገድ አመላካቾች” መሆናቸውን በመጥቀስ፣ “የሚከውኑት በጎ ምግባር ታውቆ ሊከበሩና ሊደገፉ ሲገባቸው” ሕይወታቸውን መንጠቅ አግባብነት የሌለው ተግባር ነው ሲል ግድያውን ኮንኗል፡፡ “ፀያፍ” ያለውን ይህን ተግባር ፈጻሚዎች “እኩይ ማንነታቸውን ከማጋለጡ ውጪ የሚያስገኘው ምንም ዓይነት ትርፍ” እንደሌለም ገልጿል፡፡ 

የሐጂ አሕመድ መስጅድ እና ሐሪማ ኸሊፋ በመሆን በርካታ ደረሶችን እያስተማሩ የነበሩት ኢማም ሸይኽ ሙሐመድ መኪን፣ የታላቁ ዓሊም ሸይኽ አሕመድ ደራ የልጅ ልጅ እንዲሁም የሐጂ ሙሐመድ ወሌ የወንድም ልጅ ናቸው፡፡

ሸይኽ ሙሐመድ መኪን የተገደሉበት ደራ ወረዳ በኦሮሚያ እና አማራ ክልሎች አዋሳኝ ላይ የሚገኝ አካባቢ ነው። የኦሮሚያ ክልል እስልምና ጉዳዮች ከፍተኛ ምክር ቤት እስካሁን ድረስ በጉዳዩ ላይ ያለው ነገር የለም። (ሚንበር ቲቪ)

RELATED ARTICLES

LEAVE A REPLY

Please enter your comment!
Please enter your name here

- Advertisment -
ታላቅ ግብዣ

Most Popular