Homeዜናና ወቅታዊዜናየደቡብ ኢትዮጵያ ክልል የአጀንዳ ማሰባሰብ የምክክር መድረክ በነገው እለት ሊጀመር ነው

የደቡብ ኢትዮጵያ ክልል የአጀንዳ ማሰባሰብ የምክክር መድረክ በነገው እለት ሊጀመር ነው

የኢትዮጵያ ሀገራዊ ምክክር ኮሚሽን በደቡብ ኢትዮጵያ ክልል የሚያከናውነው የአጀንዳ ማሰባሰብ የምክክር መድረክ ነገ ሰኞ በይፋ ሊጀመር መሆኑን አስታወቀ። በመድረኩ ከ2 ሺሕ በላይ ተወካዮች እንደሚገኙ ተገልጿል።

ኮሚሽኑ ይህን ያስታወቀው ዛሬ እሑድ ጥቅምት 17/2017 በሰጠው ጋዜጣዊ መግለጫ ነው። ምክክሩን አስመልክተው የኮሚሽኑ ኮሚሽነር ዮናስ አዳዬ (ዶ/ር) እና ኮሚሽነር ተገኘወርቅ ጌጡ (ዶ/ር) እንደተናገሩት፣ ከነገ ጥቅምት 18/2017 ጀምሮ በክልሉ የሚካሄደውን የአጀንዳ ማሰባሰብ የምክክር መድረክ የምታስተናግደው ወላይታ ሶዶ ከተማ ነች። በዚህም ከ96 ወረዳዎች የተመረጡ የህብረተሰብ ወኪሎችን ጨምሮ ከ2 ሺሕ በላይ ተወካዮች ይሳተፋሉ።

በክልሉ በሚከናወነው የአጀንዳ ማሰባሰብ የምክክር ሂደት የማኅበረሰብ ወኪሎችን ጨምሮ፣ በክልሉ የሚገኙ የፖለቲካ ፓርቲዎች፣ የመንግሥት አካላት፣ የተለያዩ ተቋማትና ማኅበራት ተወካዮች እንዲሁም የተፅእኖ ፈጣሪ ተወካዮች በአጀንዳ ሐሳብ ላይ ይመክራሉ ተብሏል።

የደቡብ ኢትዮጵያ የሀገራዊ ምክክር አጀንዳ ማሰባሰብ መድረክ የሚካሄደው፣ በሶማሌ ክልል የተከናወነው ተመሣሣም መድረክ መጠናቀቁን ተከትሎ ነው። በክልሉ ሲካሄድ የቆየው የአጀንዳ ማሰባሰብ የምክክር መድረክ የተጠናቀቀው ጥቅምት 13/2017 ነበር። በእለቱ የምክክር ባለድርሻ አካላት የክልሉን አጀንዳ ለኮሚሽኑ አስረክበዋል። (ሚንበር ቲቪ)

RELATED ARTICLES

LEAVE A REPLY

Please enter your comment!
Please enter your name here

- Advertisment -
ታላቅ ግብዣ

Most Popular