በደቡብ ምሥራቅ እስያ ውስጥ የምትገኘው ቬትናም የመጀመሪያውን ብሔራዊ የሐላል ኮንፍረንስ አካሔዳለች፡፡ በኮንፍረንሱ ላይ ከቬትናም እንዲሁም ከሌሎች ሀገራት የተውጣጡ የሐላል ሠርተፊኬት ሠጪ ድርጅቶች ተሳታፊ መሆናቸው ተገልጿል፡፡
በውጭ ጉዳይ፣ የሣይንስ እና ቴክኖሎጂ እንዲሁም የግብርና እና የከተማ ልማት ሚኒስቴር መሥሪያ ቤቶች በጋራ ያዘጋጁት ኮንፍረንስ የተካሔደው በሳምንቱ አጋማሽ ነው፡፡ ኮንፍረንሱ የተከናወነው በ2030 በቬትናም ጠንካራ የሐላል ኢንዱትሪ ዘርፍ ለመገንባት እና ዓለም አቀፍ ጠንካራ ትብብር ለመመሥረት በሚል ዓላማ የተደረገ ነው፡፡
ኮንፍረንሱ የሀገር ውስጥ ተሳታፊዎችን በአካል ከማገናኘቱ በተጨማሪ በመይነ መረብ በርካቶችን ያሳተፈ እንደነበር የሀገሪቱ መገናኛ ብዙኃን ጽፈዋል፡፡ እንደ ዘገባዎቹ ከሆነ ከ50 በላይ ዓለም አቀፍ ድርጅቶችን ያሳተፈው ኮንፍረንስ፤ በውጪ ሀገራት የሚገኙ የሐላል ንግድ ላይ የተሠማሩ ድርጅቶችም ተወካዮቻቸውን የላኩበት ሆኖ አልፏል፡፡
በኮንፍረንሱ ላይ የተናገሩት የሀገሪቱ ጠቅላይ ሚኒስትር ፋም ሚንህ፤ በቬትናም የሐላል ዘርፉን ማጎልበት አስፈላጊ መሆኑን በመጥቀስ፤ ዘርፉ ለወደፊቱ የዓለም አቀፍ በተለይ ደግሞ ከሙስሊሙ ዓለም ጋር ለሚኖረው የኢኮኖሚ ትብብር ምሰሶ የመሆን አቅም ያለው ነው ብለውታል፡፡
ዓለም አቀፉ የሐላል ኢንዱስትሪ ወቅታዊ የገበያ ዋጋ ከ2028 በፊት 10 ትሪሊዮን የአሜሪካን ዶላር ይደርሳል ተብሎ ይገመታል። በአሁኑ ወቅት ከዓለም የሕዝብ ቁጥር የሙስሊሞች ቁጥር አንድ አራተኛ የሚገመት ነው፡፡ ይህ ቁጥር በ2050 ወደ 2 ነጥብ 8 ቢሊዮን እንደሚደርስ የሚገመተው ሲሆን፣ በየጊዜው መጨመሩ እምቅ አቅም እንደመሆንም ዘርፉ ባለሞያዎች ይገልጻሉ፡፡ (ሚንበር ቲቪ)












