የእንግሊዝ መዲና ለንደን በሳምንቱ መጨረሻ በምታስተናግደው ዓለም አቀፍ የሰላም እና የአንድነት አውደ ርዕይ ላይ አንድ ሚሊዮን የቁርኣን ቅጂ የማሠራጨት ዓላማ ያለው ዘመቻ ይፋ ሊደረግ ነው፡፡ አውደ ርዕዩ 50 ሺሕ ሰዎች ይሰተፉበታል ተብሎ ይጠበቃል፡፡
ለ7ኛ ጊዜ በሚካሄደው በዚህ ዓለም አቀፍ የሰላም እና የአንድነት አውደ ርእይ ላይ አንድ ሚሊዮን የቁርኣን ቅጂዎች እንደሚቀርቡ ያስታወቀው መቀመጫውን ማሌዥያ ያደረገው ሬስቱ ፋውንዴሽን የተሰኘ እስላማዊ ማዕከል ነው፡፡
የፋውንዴሽኑ ሥራ አስፈፃሚ ዳቱክ ዓብዱለጢፍ ሚራሳ፤ ቅዱስ ቁርኣን የማሠራጨት ዘመቻው በሀገሪቱ ውስጥ በሚገኙ የተለያዩ ማኅበረሰቦች ውስጥ የቅዱስ ቁርኣንን መልዕክት ይበልጥ ተደራሽ ለማድረግ እንዲሁም ግንዛቤን የማሳደግ ራዕይ ያዘለ መሆኑን ገልጸዋል፡፡
ሥራ አስፈጻሚው በአውደ ርዕዩ ላይ የሚሠራጩት የቅዱስ ቁርኣን ቅጂዎች የኅትመት ጥራት ከፍተኛ እንደሚሆንም አክለዋል፡፡ ዳቱክ ዓብዱለጢፍ፤ በእንግሊዝ ውስጥ የቁርኣን ቅጂዎቹን ለማግኘት ከፍተኛ ፍላጎት እንዳለም ጠቅሰዋል፡፡
ዓለም አቀፉ የሰላም እና አንድነት አውደ ርዕይ በለንደን ከተማ የሚካሔደው በመጪው ቅዳሜ እና እሑድ ነው፡፡ ለሰባተኛ ጊዜ የሚካሔደው አውደ ርዕይ ከዐሥር ዓመታት መቋረጥ በኋላ እንደ አዲስ ተመልሶ የሚከናወን ነው፡፡ 50 ሺሕ ሰዎችን ያሳትፋል ተብሎ የሚገመተው አውደ ርዕይ የተለያዩ ባሕሎችን በማዋሐድ ስለ ሰላም እና አንድነት የሚቀነቀንበት መሆኑን አዘጋጆቹ ይገልጻሉ፡፡
የተለያዩ መርሐ ግብሮችን የሚያካትተው አውደ ርዕይ ላይ፤ በዓለም ዙሪያ የሚገኙ ፖለቲከኞች፣ የማኅበረሰብ እና የአስተሳሰብ መሪዎችን የሚሳተፉበት የፓናል ውይይት ይቀርብበታል ተብሏል። በአውደ ርዕዩ ላይ ከሁሉም የሐላል ኢኮኖሚ ዘርፎች የተውጣጡ ምርቶች እና አገልግሎት ሰጪዎች ተሳታፊ ይሆናሉ፡፡ ዝግጅቱን በመላው ለሚገኙ ሙስሊሞች በቀጥታ ለማስተላለፍ ኃላፊነቱን የወሰደው መቀመጫውን ዩናይትድ ኪንግደም ያደረገው ኢስላም ቻናል ነው፡፡ (ሚንበር ቲቪ)












