Home ዜናና ወቅታዊ ዜና አማና ሞዴል ትምህርት ቤት በይፋ ሥራ ጀመረ

አማና ሞዴል ትምህርት ቤት በይፋ ሥራ ጀመረ

በአንጋፋ የዩኒቨርሲቲ ምሑራን እና ባለሐብቶች ጥምረት የተቋቋመው አማና ሞዴል ሁለተኛ ደረጃ ትምህርት ቤት፤ በይፋ ሥራውን ጀመረ፡፡ ሞዴል ትምህርት ቤቱ በአንድ ክፍል 25 ተማሪዎችን ብቻ ያስተምራል ተብሏል፡፡

በአዲስ አበባ ከተማ ሥራውን የጀመረው ትምህርት ቤቱ፤ ዛሬ ሰኔ 27/2016 በይፋ ሥራ ሲጀምር የከተማው ትምህርት ቢሮ፣ ትምህርት ቤቱ የሚገኝበት ክፍለ ከተማ እና ወረዳ የትምህርት እና ሥልጠና ባለሥልጣን ኃላፊዎች ተገኝተዋል፡፡

በዛሬው ይፋዊ የምረቃ ሥነ ሥርዓት ላይ የአማና ሞዴል ትምህርት ቤት ርእሰ መምህር አሚና መኑር (ዶ/ር)፣ ትምህርት ቤቱ በተለይ ትኩረት አድርጎ የሚሠራበትን ዘርፍ አብራርተዋል፡፡ እንደ ርእሰ መምህሯ ከሆነ በተግባር የተደገፈ የትምህርት አሠጣጥ የሚተገብረው አማና ሞዴል ትምህርት ቤት፣ ተማሪዎች ለተፈጥሮ ሣይንስ ትምህርቶች ዝንባሌ እና ግንዛቤያቸውን ከፍ ለማድረግ ይሠራል፡፡

አሚና መኑር (ዶ/ር) ትምህርት ቤቱ ለተፈጥሮ ሣይንስ ትምህርቶች መስጠቱ፤ በማኅበራዊ ሣይንስ የትምህርት ዓይነቶችም ጥራት ያለው ትምህርት እንደሚሰጥ አጽንዖት ሰጥተው ተናግረዋል፡፡

አዲሱ አማና ሞዴል ትምህርት ቤት በአዲስ አበባ ከተማ አስተዳደር የትምህርት ሥልጠና ጥራት ቁጥጥር ባለሥልጣን ከፍተኛ ባለሞያዎችና ከተገመገመ በኋላ የምዘና መለኪያዎችን በማሟላቱ ከሐምሌ 1/2016 እስከ ሰኔ 30/2018 ተማሪዎችን ተቀብሎ እንዲያስተምር ፍቃድ እንደተሰጠው ኃላፊዎቹ ገልጸዋል፡፡

የአዲስ አበባ ትምህርት ቢሮ ኃላፊ አቶ ዘላለም ሙላቱ በዛሬው የአማና ሞዴል ትምህርት ቤት ምረቃ ሥነ ሥርዐት ወቅት

ትምህርት ቤቱ በአዲሱ ትምህርት ዘመን የዘጠነኛ እና አስረኛ ክፍል ተማሪዎችን ተቀብሎ ማስተማር እንደሚጀምር የአማና ትምህርት ቤት የአካዳሚክ ቦርድ አባል የሆኑት አቶ አልዩ ሰዓድ ለሚንበር ቲቪ ገልጸዋል፡፡ አቶ አልዩ ትምህርት ቤታቸው በአዲሱ የትምህርት ዘመን በሁለቱ የክፍል እርከኖች ተማሪዎችን ለመቀበል በሙሉ አቅም ዝግጁ መሆኑን የጠቀሱ ሲሆን፣ በሌሎች የክፍል እርከኖች እንዲያስተምሩ ፍላጎት መኖሩን ጠቁመዋል፡፡ የአካዳሚክ ቦርድ አባሉ አማና ሞዴል ትምህርት ቤት በአዲሱ የትምህርት ዘመን የሚቀበላቸው ተማሪዎች ቁጥር 300 እንደሚሆንም አስረድተዋል፡፡

በአዲስ አበባ ከተማ ሥራውን በይፋ የጀመረው አማና ሞዴል ትምህርት ቤት መሥራቾች፣ ትምህርት ቤቱን ከመመሥረታቸው በፊት አማና የወጣቶች ልማት ኔትወርክ የተሰኘ የሰቪል ማኅበረሰብ ድርጅት አቋቁመው ሲንቀሳቀሱ የነበሩ ናቸው፡፡ ድርጅቱ በአዲስ አበባ እና በክልል ከተሞች ለሚገኙ ትምህርት ቤቶች የተፈጥሮ ሣይንስ መምህራን የሣይንስ ትምህርቶችን በተግባር አስደግፎ በማስተማር ላይ ያተኮረ ነጻ የሥልጠና መርሐ ግብር ሲያካሔድ መቆየቱም በዛሬው የምረቃ መርሐ ግብር ላይ ተገልጧል፡፡

አማና ሞዴል ትምህርት ቤት ለአዲሱ የትምህርት ዘመን ምዘገባውን የሚጀምረው በቀጣይ ሳምንት መሆኑን አስታውቋል፡፡ (ሚንበር ቲቪ)

NO COMMENTS

LEAVE A REPLY

Please enter your comment!
Please enter your name here