የኢትዮጵያ እስልምና ጉዳዮች ጠቅላይ ምክር ቤት (መጅሊስ) ሳዑዲ ዐረቢያ መካ ከተማ ውስጥ የሚገኝውን የንጉሥ አባ ጂፋር የኢትዮጵያውያን እንግዳ ማረፊያ ሕንጻ ችግር ለመፍታት እንደሚሠራ ያስታወቀው በፕሬዝዳንቱ በኩል ነው። የእንግዳ ማረፊያው በዘንድሮው ዓመት የብቃት ደረጃ ባለማሟላቱ አገልግሎት ሳይሰጥ መቅረቱ ተገልጿል።
ምክር ቤቱ ትናንት ቅዳሜ ሰኔ 15/2016 ምሽት ባወጣው መረጃ፣ ሳዑዲ ዐረቢያ የሚገኙት ፕሬዝዳንቱ ሸይኽ ሐጂ ኢብራሂም ቱፋ የመሩት ቡድን ለበርካታ ዓመታት ለኢትዮጵያውያን ሑጃጅ ማረፊያነት ሲያገለግል የቆየውን ሕንጻ ጎብኝቷል።
በንጉሥ አባ ጂፋር የተገነባውና ከአንድ መቶ ዓመት በላይ ያስቆጠረው ሕንጻ በዘንድሮው ዓመት የሐጅ ሥነ ሥርዓት ወቅት አገልግሎት አለመስጠቱን መጅሊስ አረጋግጧል። እንደ ምክር ቤቱ ከሆነ፣ ሕንጻው ለኢትዮጵያውያን አገልግሎት ያልሰጠው በሳዑዲ ዐረቢያ መንግሥት የተቀመጠውን የብቃት ደረጃ ሳያሟላ በመቅረቱ ነው።

የምክር ቤቱ ፕሬዝዳንት ከመሩት ልዑክ ጋር ሕንጻውን ከጎበኙ በኋላ የሑጃጅ ማረፊያው ታሪካዊ አሻራውን በሚያጎለብት መልኩ፣ መሟላት ያለበትን በማስተካከል በሚቀጥለው ዓመት ችግሩ ተፈትቶ ለእንግዶች ማረፊያነት የተሻለ አገልግሎት እየሰጠ እንዲቀጥል መደረግ እንደሚኖርበት ተናግረዋል ተብሏል።
የንጉሥ አባ ጂፋር የኢትዮጵያውያን ሑጃጅ ማረፊያ የተገነባው በ1900 እንደሆነ ይነገራል።












