በትምህርት ሚኒስቴር የሚሰጠው የዩኒቨርስቲ መውጫ ፈተና በሀገር አቀፍ ደረጃ ሊሰጥ ነው፡፡ ነገ ዐርብ ሰኔ 14/2016 በሚሰጠው ፈተና ተማሪዎች በሦስት ክፍለ ጊዜ ፈተናውን ይወስዳሉ ተብሏል፡፡
እንደ ሚኒስቴሩ መረጃ ከሆነ የነገው የጊዜ ሠሌዳ ለፈተና በድጋሚ የሚቀመጡ ተፈታኞችን የሚያካትት እንደሚሆን ተገልጧል፡፡ በነገው ዕለት ፈተናውን ለመውሰድ የአገልግሎት ክፍያ የከፈሉና የሥም ዝርዝራቸው ከቀድሞው ዩኒቨርስቲያቸው ለትምህርት ሚኒስቴር የተላከላቸው አመልካቾች ይሆናሉ፡፡
የትምህርት ሚኒስቴር ለመጀመሪያ ጊዜ የመውጫ ፈተና የሚወስዱ ተመራቂዎች አስፈላጊ የመፈተኛ መረጃዎችን በተመለከተ በተቋማቸው በኩል እንደሚደርሳቸው ማስታወቁ የሚታወስ ነው።
ባሳለፍነው ዓመት በሐምሌ ወር መሰጠት የተጀመረው የመውጫ ፈተና ለሁለተኛ ጊዜ በያዝነው ዓመት የካቲት ወር ላይ ተሰጥቶ ነበር።
ከዚህ ቀደም በየካቲት ወር ለሁለተኛ ጊዜ የተሰጠው ፈተና በ47 የመንግሥት ተቋማት እና በ84 የፈተና ማዕከላት ተሰጥቶ የነበረ ሲሆን በመንግሥት እና በግል ተቋማት ለመጀመሪያ ጊዜ የሚፈተኑትን ጨምሮ 149 ሺሕ 145 ተፈታኞች በ204 የፈተና ፕሮግራሞች እንደተፈተኑ ይታወሳል።












