Homeዜናና ወቅታዊዜናሳዑዲ ዐረቢያ የሐጅ ቪዛ አልያዙም ያለቻቸውን በመቶ ሺሕዎች የሚቆጠሩ ሰዎች ከመካ ከተማ...

ሳዑዲ ዐረቢያ የሐጅ ቪዛ አልያዙም ያለቻቸውን በመቶ ሺሕዎች የሚቆጠሩ ሰዎች ከመካ ከተማ እንዲወጡ አደረገች

ከመላው ዓለም ለሐጅ ሥነ ሥርዐት ክንውን ወደ ሀገሯ የሚገቡ ምዕመናንን እያስተናገደች የምትገኘው ሳዑዲ ዐረቢያ፣ የሐጅ ቪዛ አልያዙም ያለቻቸውን ከ300 ሺሕ በላይ ሰዎች ከመካ ከተማ እንዲወጡ ማድረጓ ተሰማ፡፡ ከከተማዋ እንዲወጡ ከተደረጉት ውስጥ 150 ሺሕ የሚሆኑት ከውጪ ሀገራት በጉብኝት ቪዛ የገቡ መሆናቸው ተገልጧል፡፡

የሳዑዲ ዐረቢያ ባሥልጣናት እንደገለጹት፣ የሀገሪቱ ፖሊስ እነዚህን ግለሰቦች ከመካ ያስወጣው የሐጅ ቪዛ ከያዙ ምዕመናን ውጪ ወደ ከተማዋ መግባት የሚከለክለው መመርያ ተግባራዊ መደረግ ከተጀመረ በኋላ ነው፡፡

ሳዑዲ ዐረቢያ ፖሊስ ከመካ እንዲወጡ ካደረጋቸው መካከል 153 ሺሕ 998 ሰዎች በጉብኝት ቪዛ የገቡ የውጭ ሀገራት ዜጎች ናቸው፡፡ በተጨማሪም 171 ሺሕ 587 ነዋሪነታቸው ሳዑዲ ዐረቢያ ውስጥ ቢሆንም መቀመጫቸው መካ አይደለም የተባሉና የሐጅ ቪዛ ያልያዙ ሰዎች ለቀው እንዲወጡ መደረጉን የሳዑዲ ዜና አገልግሎት ዘገባ ያመለክታል፡፡

ሳዑዲ ዐረቢያ በዘንድሮው የሐጅ ሥነ ሥርዐት ክንውን ለመሳተፍ ከመላው ዓለም ሀገራት የተነሱ ምዕመናንን መቀበሏን በመቀጠል እስካሁን ድረስ ወደ ሀገሯ የገቡት ከ1.3 ሚሊዮን በላይ ደርሰዋል፡፡ በዚህ ሳምንት ለሚፈጸመው የሐጅ ክንውን፣ በቀጣይ ቀናት ሌሎች አንድ ሚሊዮን ምዕመናን ወደ ሀገሪቱ ይገባሉ ተብሎ ይጠበቃል፡፡

ሳዑዲ ዐረቢያ እንግዶቹን የምታስተናግደው ለሥነ ሥርዐቱ ብቻ በሚል የተለየ ቪዛ አዘጋጅታ ሲሆን፣ በዚህ ምክንያት የሐጅ ቪዛ ከያዙ ምዕመናን ውጪ ሌሎች እንግዶች ወደ ሀገሯ ቢገቡም ወደ ቅድስቲቱ መካ ከተማ እንዲዘልቁ ፍቃድ እንደማትሰጥ ቀድማ አሳውቃ ነበር፡፡ ከዚህ በተጨማሪም ያለ ሐጅ ቪዛ ወደ መካ ከተማ የገቡ ምዕመናን ቅጣት እደሚጠብቃቸው ገልጻለች፡፡

ሀገሪቱ መቀጮ የሚያስከፍለውን ደንብ ያወጣችው በሥነ ሥርዐቱ ወቅት ሊከሰት የሚችለውን መጨናነቅ ለመቀነስ ነው በሚል ነው፡፡ ሳዑዲ ዐረቢያ ይህን ርምጃ ይበልጥ ያጠናከረችው ከዘጠኝ ዓመታት በፊት ሚና ላይ አደጋ ከተከሰተ በኋላ መሆኑን የሀገሯ ባለሥልጣናት ይናገራሉ፡፡

የ1445 ዓ.ሂ የሐጅ ሥነ ሥርዐት መከናወን የሚጀምረው ከፊታችን ጁመዓ አንስቶ ባሉት ተከታታይ ቀናት መሆኑ ይታወቃል፡፡ (ሚንበር ቲቪ)

RELATED ARTICLES

LEAVE A REPLY

Please enter your comment!
Please enter your name here

- Advertisment -
ታላቅ ግብዣ

Most Popular