Homeዜናና ወቅታዊዜናከወለድ ነፃ የባንክ አገልግሎት የተቀማጭ ገንዘብ መጠን በየዓመቱ በአማካይ 24 በመቶ እያደገ...

ከወለድ ነፃ የባንክ አገልግሎት የተቀማጭ ገንዘብ መጠን በየዓመቱ በአማካይ 24 በመቶ እያደገ መምጣቱ ተገለጸ

በኢትዮጵያ ከወለድ ነፃ የባንክ አገልግሎት የተቀማጭ ገንዘብ መጠን በየዓመቱ በአማካይ 24 በመቶ እያደገ መምጣቱ ተገለጸ፡፡ ባንኮቹ እስካሁን ድረስ በአጠቃላይ 222.8 ቢሊዮን ብር ተቀማጭ ገንዘብ ሰብስበዋል ተብሏል፡፡

በሀገሪቱ የሚገኙ ከወለድ ነፃ አገልግሎት የሚሰጡ ባንኮች ተቀማጭ ገንዘብ መጠን በየዓመቱ በአማካይ ከ24 በመቶ እያደገ መምጣቱን ያመለከተው የባንኮቹን ወቅታዊ አፈጻጸም የሚያመለክተው መረጃ ነው፡፡ ከተቀማጭ ገንዘብ በተጨማሪ በባንኮቹ የሚሰጠው ብድር ምጣኔም በተለይ በ2016 የሒሳብ ዓመት ከቀዳሚዎቹ ዓመታት የተሻለ ዕድገት ማሳየት ጀምሯል ነው የተባለው፡፡

በዚህ ዘርፍ ትልቁን የገበያ ድርሻ የያዘው የኢትዮጵያ ንግድ ባንክ መሆኑን መረጃውን ጠቅሶ ሪፖርተር ጋዜጣ ዘግቧል፡፡ በዘገባው የተጠቀሰው የኢትዮጵያ ንግድ ባንክ እስከ 2016 የሒሳብ ዓመት አሥር ወራት ማሰባሰብ የቻለው አጠቃላይ ተቀማጭ ገንዘብ 114.8 ቢሊዮን ብር መሆኑ ተገልጧል፡፡ ይህም በአሥር ወራት ውስጥ ብቻ ከ24 ቢሊዮን ብር በላይ አዲስ ተቀማጭ ገንዘብ ማሰባሰብ መቻሉን የሚያመለክት ነው፡፡ 

የአስቀማጭ ደንበኞችን ቁጥር በተመለከተም የኢትዮጵያ ንግድ ባንክ ከወለድ ነፃ እያስቀመጡ ያሉ ደንበኞች ቁጥር 7.2 ሚሊዮን በላይ ደርሷል ተብሏል፡፡ በአሥር ወራት ውስጥ የአስቀማጭ ደንበኞች ቁጥር ከ20 በመቶ በላይ ዕድገት አሳይቷል፡፡

የኢትዮጵያ ንግድ ባንክ ከብድር አሰጣጥ ጋር በተያያዘም ከወለድ ነፃ የባንክ አገልግሎት ያቀረበው ብድር ከሌሎች ዓመታት በተለየ ጭማሪ ማሳየቱ ሲገለጽ፣ የተሰጠው የብድር ክምችት 40.5 ቢሊዮን ብር ደርሷል፡፡ ሚንበር ቲቪ ሙሉ ለሙሉ ከወለድ ነፃ ባንክ አገልግሎት ከሚሰጡ ባንኮች ተጨማሪ መረጃ ለማካተት ያደረገው ሙከራ ሳይሳካ ቀርቷል፡፡

በኢትዮጵያ በአሁኑ ጊዜ ከወለድ ነፃ የባንክ አገልግሎት በመስኮት ደረጃ የሚሰጡ ከሃያ በላይ ባንኮች ይገኛሉ፡፡ ከባንኮቹ ውስጥ ሙሉ ለሙሉ ከወለድ ነፃ የባንክ አገልግሎት የሚሰጡ አራት ባንኮች በኢንዱስትሪው ውስጥ እየተንቀሳቀሱ ነው፡፡

RELATED ARTICLES

LEAVE A REPLY

Please enter your comment!
Please enter your name here

- Advertisment -
ታላቅ ግብዣ

Most Popular