Home ዜናና ወቅታዊ ዜና ኢራን ፕሬዝዳንቷን ጨምሮ ከፍተኛ ባለሥልጣኖቿን በሄሊኮፕተር መከስከስ አደጋ አጣች

ኢራን ፕሬዝዳንቷን ጨምሮ ከፍተኛ ባለሥልጣኖቿን በሄሊኮፕተር መከስከስ አደጋ አጣች

የኢራን ፕሬዝዳንት የነበሩት ኢብራሂም ራይሲ



የኢራኑ ፕሬዝዳንት ኢብራሂም ራይሲ ተሳፍረውባት በነበረው ሄሊኮፕተር በደረሰው አደጋ ሕይወታቸው አለፈ፡፡ ከፕሬዝዳንቱ በተጨማሪ የውጭ ጉዳይ ሚኒስትሩ ሆሴይን አሚር ዐብዶላሂያን በአደጋው ሕይወታቸውን አጥተዋል፡፡

ፕሬዝዳንቱን አሳፍራ የነበረችው ሄሊኮፕተር ትናንት እሑድ የተነሳችው ከጎረቤት አዘርባጃን ነበር፡፡ ራይሲ በአዘርባጃን በነበራቸው ቆይታ ከሀገሪቱ ፕሬዝዳንት ኢልሃም አሊዬቭ ጋር ሀገራቱ በጋራ ያስገነቡትን ድልድይ አስመርቀዋል፡፡ በዚህ ምርቃት ሥነ ሥርዐት ላይ ለመታደም ሬይሲን ከጫነችው ሄሊኮፕተር ውጪ ሌሎች ሁለት ሄሊኮፕተሮች እርሳቸውን ያጀበ ልዑክ በመጫን ወደ አዘርባጃን በረራ አድርገዋል፡፡

የኢራን ፕሬዝዳንት የነበሩት ኢብራሂም ራይሲ እና የአዘርባጃን ፕሬዝዳንት ኢልሃም አሊዬቭ ትናንት ድልድይ ሰያስመርቁ

የኢራኑ የመንግሥት ብዙኃን መገናኛ ኢርናን ጨምሮ የሀገሪቱ መገናኛ ብዙኃን ይዘዋቸው በወጧቸው ዘገባዎች ላይ ራይሲ ከድልድይ ምርቃቱ በኋላ ወደ ቴህራን ሲመለሱ እርሳቸውን የጫነችው ሄሊኮፕተር በሀገሪቱ ሰሜናዊ ክፍል በከባድ ጭጋግ አስቸጋሪ የአየር ሁኔታ ውስጥ ከገባች በኋላ አደገኛ በሆነ ሁኔታ ስታርፍ፣ ሁለቱ ሄሊኮፕተሮች ግን በሰላም ወደ ኢራን ተመልሰዋል፡፡

ራይሲን የጫነችው ሄሊኮፕተር ትናንት እሑድ ከሰዓት በአደገኛ ሁኔታ ማረፏ ከተሰማ በኋላ፣ የአደጋ ጊዜ ሠራተኞች ፍለጋ የተሠማሩ ቢሆንም የነበረው ጭጋጋማ አየር ሥራቸውን አስቸጋሪ እንዳደረገው ሲነገር ቆይቷል፡፡ ራይሲን የጫነችው ሄሊኮፕተር ከፕሬዝዳንቱ በተጨማሪ የውጭ ጉዳይ ሚኒትራቸውን ሆሴይን አሚር ዐብዶላሂያንን፣ የኢራን ምሥራቃዊ አዘርጃን ክፍል ገዢ ማሊክ ራሕመቲ፣ የአያቶላህ ዓሊ ኻሚኒ የግዛቷ ተጠሪ አያቶላህ ሙሐመድ ዓሊ ሐሺምን እንዲሁም የፕሬዝዳንቱ ጠባቂዎችም ነበሩባት፡፡  

ፕሬዝዳንቱን የያዘችው ሄሊኮፕተር በኃይል ያረፈችው በአዘርባጃን ድንበር ላይ በምትገኘው ጆልፋ በተባለ ሥፍራ እንደሆነ አስቀድሞ በኢራን መገናኛ ብዙኃን ቢገለጽም፣ ትክክለኛው ሥፍራ ዲዝማር ተብሎ የሚጠራ ጥብቅ ደን ያለበት መሆኑን የአልጀዚራ ዘገባ ያመለክታል፡፡ እንደ ዘገባዎች ከሆነ ፕሬዝዳንቱን የያዘችው ሄሊኮፕተር በኃይል ያረፈችበት ዲዝማር ያስተናገደው ጭጋጋማ የአየር ሁኔታ ድንገተኛ ነው፡፡

የአደጋ ጊዜ ሠራተኞች የሄሊኮፕተሩን በኃይል ማረፍ ተከትሎ ፍለጋቸውን ቀጥለው ዛሬ ሰኞ ማለዳ የኢራኑ ፕሬዝዳንት ኢብራሂም ራይሲን ጨምሮ በውስጡ የነበሩ ሁሉም ሰዎች ሕይወታቸው እንዳለፈ ይፋ ተደርጓል፡፡

በሄሊኮፕተር አደጋው ሕይወታቸው ያለፈው ኢብራሂም ራይሲ ዕድሜያቸው 63 ነው፡፡ ራይሲ ኢራንን በፕሬዝንዳንትነት መምራት የጀመሩት እ.አ.አ ከ2021 አንስቶ ነው፡፡ የአያቶላህ ዓሊ ኻሚኒ ወራሽ ይሆናሉ ተብሎ በሥፋት ይነገርላቸው የነበሩት ራይሲ፣ በቀጣይ ዓመት ሀገራቸው በምታካሄደው ምርጫ በድጋሚ ለመሳተፍ ዕቅድ ነበራቸው፡፡

ፕሬዝዳንታቸውን ያጡት የሀገሪቱ ባለሥልጣናት በዛሬው እለት አስቸኳይ ስብሰባ እያካሄዱ መሆኑ ተሰምቷል፡፡ በሀገሪቱ ሕግ መሠረት ሕይወታቸው በአደጋ ያለፈውን የኢብራሂም ራይሲን ወንበር የሚይዙት ምክትላቸው ሙሐመድ ሞኽበር ይሆናሉ፡፡ ሆኖም የምክትሉ ሥልጣን የሚቆየው ቢበዛ ለ50 ቀናት ብቻ ነው፡፡ ኢራን በዚህ የጊዜ ሰሌዳ ውስጥ ምርጫ ማከናወን ይኖርባታል፡፡ የቀድሞው የኢራን ጠቅላይ ዐቃቤ ሕግ ኢብራሂም ራይሲ፣ በሸሒድ ባሔሽቲ ዩኒቨርሲቲ ውስጥ ተባባሪ ፕሮፌሰር ከሆኑት ባለቤታቸው ጀሚሌ አላሞልሆዳ ሁለት ልጆችን አፍርተዋል፡፡ [ሚንበር ቲቪ]

NO COMMENTS

LEAVE A REPLY

Please enter your comment!
Please enter your name here