የእስላማዊ ትብብር ድርጅት አስቸኳይ ጉባዔ ለማድረግ ለአባል ሀገሮች ጥሪ አቅርቧል፡፡ የድርጅቱ ጉባዔ የሚደረገው በቱርክ ኢስታንቡል ከተማ መሆኑን አስታውቋል፡፡ የፊታችን ቅዳሜ ሰኔ 14/2017 የሚካሄደው የድርጅቱ አስቸኳይ ጉባዔ የተጠራው፤ እስራኤል በኢራን ላይ ጥቃት በመሰንዘር ሁለቱ ሀገሮች ወደ ጦርነት በገቡበት ወቅት ነው፡፡
የስብሰባው ትኩረት በዚሁ ጦርነት ላይ እንደሚሆንም ቲአርአቲ ዘግቧል፡፡ በከፍተኛ ባለሥልጣናት ደረጃ የሚካሄደው ጉባዔ፤ የሙስሊሙ ዓለም ከጥቃቱ ጋር በተገናኘ የጋራ አቋም እንዲይዝ የሚያደርግ መሆኑም ተገልጿል፡፡
በቱርኩ ፕሬዝዳንት ረጀብ ጠይብ ኤርዶጋን ይከፍቱታል ተብሎ በሚጠበቀው ጉባዔ ላይ የሳዑዲ ዐረቢያው ውጭ ጉዳይ ሚኒስትር ፈይሰል ቢን ፈርሃን ንግግር ያደርጋሉ፡፡ በተጨማሪም የኢራን ውጭ ጉዳይ ሚኒስትር አባስ አራቅቺ ይሳተፋሉ ተብሎ እንደሚጠበቅ ሬውተርስ የዜና ወኪል ከቱርክ ውጭ ጉዳይ ሚኒስቴር ምንጮች ሰምቻለሁ ብሎ ዘግቧል፡፡
በኢራን ላይ የተሰነዘረውን ጥቃት በተመለከተ የሙስሊሙ ዓለም የጋራ አቋም ለመያዝ እንዲያስችለው አስቸኳይ ስብሰባ የጠራው የእስላማዊ ትብብር ድርጅት፤ ባለፈው ሣምንት በዋና ጸሐፊው ሒሴን ብራሂም ጣሃ በኩል የእስራኤልን ድርጊት አውግዟል፡፡
የእስላማዊ ትብብር ድርጅት የተመሠረተው እ.አ.አ በ1969 ነው። 57 አባል ሀገሮችን ባቀፈው ድርጅት ውስጥ 48ቱ ሙስሊሞች ናቸው። ድርጅቱ የሙስሊሙ ዓለም የጋራ ድምጽ በመሆን የሙስሊሙን ዓለም ጥቅሞች በዓለም አቀፍ ሰላም እና ስምምነት መንፈስ ለመጠበቅ እንደሚሠራ የሚገልጽ ሲሆን በተባበሩት መንግሥታት እና በአውሮፓ ኅብረት ቋሚ መቀመጫ አለው። (ሚንበር ቲቪ)












