Homeዜናና ወቅታዊዜናፍልስጤማዊው የቀድሞ የሜታ ባልደረባ በኩባንያው ላይ ክስ መሠረተ

ፍልስጤማዊው የቀድሞ የሜታ ባልደረባ በኩባንያው ላይ ክስ መሠረተ

ግዙፎቹን የማኅበራዊ ትስስር መድረኮች ፌስቡክ፣ ዋትሳፕ እና ኢንስታግራምን የሚያስተዳድረው ሜታ ኩባንያ፣ በፍልስጤማዊ አሜሪካዊው የቀድሞ ባልደረባው ክስ ተመሠረተበት፡፡ የኩባንያው የቀድሞ ባልደረባ ሜታ ፍልስጤምን ከተመለከቱ ይዘቶች ጋር በተገናኘ አላግባብ እንዳሰናበተው ጠቅሷል፡፡

ፈራህ ሐማድ የተባለው የቀድሞው የሜታ ባልደረባ፣ ክሱን የመሠረተው በካሊፎርንያ ግዛት ነው፡፡ በኩባንያው ውስጥ እ.እ.አ ከ2021 አንስቶ ያገለገለው የምሕንድስና ባለሞያው ፈራህ ሐማድ፣ በኩባንያው ውስጥ በሚሠራበት ጊዜ በባልደረቦች መካከል ፍልስጤምን በተመለከተ የሚደረጉ የመልዕክት ልውውጦች ይሰረዙ እንደነበር ተናግሯል፡፡

የቀድሞው የሜታ ባልደረባ ይሰረዙብን ነበር ካላቸው መልዕክቶች ውስጥ በጋዛ የሚገኙ ዘመዶቻቸውን ኅልፈት የሚያረዱ ይገኙበታል፡፡ ሐማድ ከባልደረቦቹ ጋር በነበረው ልውውጥ የፍልስጤምን ሰንደቅ የያዘ ስሜት ገላጭ ምሥል (emoji) መጠቀማቸውም ምርመራ እንዲካሄድባቸው ማድረጉንም በክሱ ላይ አስቀምጧል፡፡ ሐማድ እንደገለጸው ከሆነ ኩባንያው ፍልስጤምን ለተመለከቱ የመልዕክት ልውውጦች እርምጃ ቢወስድም፣ ሌሎች ባልደረቦች በተመሳሳይ አውድ ውስጥ የእስራኤል አልያም የዩክሬንን ሰንደቅ ሲጠቀሙ በዝምታ አልፎታል፡፡

ፈራህ ሐማድ

ሐማድ ለፍርድ ቤት ባቀረበው ክስ የቀድሞ አሠሪው ሜታ ፍልስጤምን የተመለከቱ ቪድዮዎችን ከአውድ ውጪ በመተርጎም ፀያፍ ይዘት ካላቸው ምድብ ውስጥ እንደሚያካትት የገለጸ ሲሆን፣ ለዚህ በማሳያነት የጠቀሰው በፍልስጤማዊው የፎቶ ጋዜጠኛ ሞታዝ አዛይዛ የተቀረጸ በጋዛ የሚገኝ ሕንጻ ሲወድም የሚያሳይ ምሥልን ነው፡፡ ሐማድ በኩባንያው ይካሄዳሉ ያላቸውን ድርጊቶች ለማረም ሲንቀሳቀስ ሜታ እንዳሰናበተውም አስታውቋል፡፡

ግዙፉ ሜታ እስራኤል በጋዛ እየፈጸመች የምትገኘውን ጥቃት ተከትሎ ከባልደረቦቹ ተመሳሳይ ክስ የሚቀርብበት ነው፡፡ ኩባንያው በተደጋጋሚ ለፍልስጤም ድጋፍ የሚሰጡ ድምጾች እንዲታፈኑ ያደርጋል በሚል ነው ክሱ የሚሰማበት፡፡ ከዚሁ ጋር ተያይዞም ቁጥራቸው ወደ 200 የሚጠጋ የኩባንያው ሠራተኞች ለባለቤቱ ማርክ ዙከርበርግ የቅሬታ ደብዳቤ ጽፈዋል፡፡  

እስራኤል ባለፉት ወራት በጋዛ እየፈጸመችው በሚገኘው ጥቃት ሕፃናት እና እናቶችን ጨምሮ ቢያንስ 35 ሺሕ ንጹሐን ተገድለዋል፡፡ እስራኤል የምትፈጽውን ጥቃት አሉታዊ ምሥል ለመስጠት በማኅበራዊ ትስስር መድረኮች ላይ ሐሰተኛ መልዕክት የሚያሠራጩ ቦቶችን እንደምትጠቀም በተደጋጋሚ ሲገለጽ ቆይቷል፡፡

RELATED ARTICLES

LEAVE A REPLY

Please enter your comment!
Please enter your name here

- Advertisment -
ታላቅ ግብዣ

Most Popular